به‌شیر حه‌داد: ده‌نگ له‌سه‌ر پڕۆژه‌یاسای بودجه نادرێت و ده‌گه‌ڕێته‌وه بۆ حكومه‌ت
به‌شیر حه‌داد، جێگری دووه‌می سه‌رۆكی په‌رله‌مانی عیراق
وێستگه نیوزـ
جێگری دووه‌می سه‌رۆكی په‌رله‌مانی عیراق دڵنیایی خۆی ده‌ربڕی له گه‌ڕاندنه‌وه‌ی پرۆژه یاسای بودجه‌ی 2019ی عیراق بۆ حكومه‌ت و رایگه‌یاند كه ده‌نگدان له‌سه‌ر پڕۆژه یاسای بودجه ناكرێت.
به‌شیر حه‌داد، جێگری دووه‌می سه‌رۆكی په‌رله‌مانی عیراق له لێدوانێكدا بۆ میدیاكانی نزیك له پارتی دیموكراتی كوردستان راگه‌یاند: كار له‌سه‌ر ئه‌وه ده‌كه‌ن، یه‌كڕیزی فراكسیۆنه كوردستانییه‌كان بپارێزن و لیژنه‌ی هه‌ماهه‌نگی فراكسیۆنه كوردستانییه‌كانیش به‌رده‌وام ده‌بێت له كاره‌كانی بۆ ئه‌وه‌ی نزیكبوونه‌وه‌ی زیاتر هه‌بێت و كاریگه‌رییان زیاتر بێت.
سه‌باره‌ت به بودجه‌ی گشتیی 2019 حكومه‌تی عیراق كه ئاراسته‌ی په‌رله‌مان كراوه، به‌شیر حه‌داد وتی: دڵنیام ده‌نگدان له‌سه‌ر پڕۆژه یاسای بودجه ناكرێت. فراكسیۆنه كوردییه‌كان كۆكن له‌سه‌ر ئه‌وه‌ی پرۆژه یاسای بودجه بگه‌ڕێته‌وه حكومه‌ت.
وتیشی بودجه‌كه زۆر نادادپه‌روه‌ری به‌رامبه‌ر به كورد تێدایه، له‌وانه: رێژه‌ی بودجه‌ی هه‌رێمی كه‌مكردوه‌ته‌وه و ناوی هه‌رێمی كوردستانی نه‌هێناوه و هه‌ڵه‌بجه‌ی وه‌ك پارێزگا نه‌ناساندوه وهیچی بۆ پێشمه‌رگه تێدا نییه، جه‌ختیشیكرده‌وه كه هیچ كوتله‌یه‌كی شیعه و سوننه‌ش رازی نین به تێپه‌ڕاندنی بودجه به‌و جۆره.
به‌وته‌ی جێگری دووه‌می سه‌رۆكی په‌رله‌مانی عیراق، دوای ئه‌وه‌ی خوێندنه‌وه‌ی یه‌كه‌م بۆ پرۆژه یاسای بودجه ده‌كرێت، لیژنه هه‌میشه‌ییه‌كان تاوتوێی ده‌كه‌ن و له لیژنه‌كاندا بڕیار له‌سه‌ر ئه‌وه ده‌درێت پرۆژه‌كه بگه‌ڕێته‌وه بۆ حكومه‌ت.
له باره‌ی پشكی كورد له وه‌زاره‌ته‌كاندا، به‌شیر حه‌داد وتی: تا ئێستا ئه‌وه‌ی رێككه‌وتنی له‌سه‌ر كراوه، كورد سێ وه‌زاره‌تی به‌ركه‌وتووه، دوو وه‌زاره‌تیان راگه‌یه‌ندراوه، كه وه‌زاره‌تی دارایی و نیشته‌جێكردن و ئاوه‌دانكردنه‌وه‌یه، یه‌ك وه‌زاره‌ت له پشكی كورد ماوه، ئه‌ویش وه‌زاره‌تی كۆچ و كۆچبه‌رانه، هێشتا له نێوان پارتی و یه‌كێتی یه‌كلایان نه‌كردووه‌ته‌وه، قسه و باسێكی نا ره‌سمیش هه‌یه، ده‌وترێت ره‌نگه وه‌زاره‌تێكی دیكه بۆ كورد زیاد بكرێت.
سه‌باره‌ت به پرسی كه‌ركوك، به‌شیر حه‌داد ئاشكرایكرد: پێش ماوه‌یه‌ك پڕۆژه بڕیارێك پێشكه‌ش به په‌رله‌مان كرا بۆ لابردنی خاڵی گومرگی نێوان پارێزگاكان، به‌ڵام به هۆی سه‌رقاڵیی به پرسی پێكهێنانی حكومه‌ت ئه‌و پرۆژه‌یه باس نه‌كراوه و چاوه‌ڕوان ده‌كرێت له دانیشتنه‌كانی داهاتوو، بڕیاری له‌سه‌ر بدرێت.
وتیشی: كێشه‌یه‌كی مرۆیی گه‌وره له كه‌ركووك له ئارادایه و زیاتر له 150 هه‌زار هاووڵاتی ئاواره‌ن و ده‌یان كه‌س ده‌ستگیركراوه و كێشه‌ی زه‌وی و زاریش هاتووه‌ته ئاراوه، بۆیه پێویسته له چوارچێوه‌ی یاسا و ده‌ستوردا ئه‌و پرسه یه‌كلا بكرێته‌وه.
PM:10:10:04/11/2018
ئه‌م بابه‌ته 1180
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت