‌دوو پێشمەرگە شەهید بوون و سێ پاسدار کوژران

وێستگە نیوز-

حزبی دیموکراتی کوردستانی ئێران ڕایگەیاند لە پێکدادانێکیاندا لەگەڵ سوپای پاسداران لە نزیک پاوە دوو پێشمەرگە شەهید بوون و سێ پاسداریش کوژراون.

حزبی دیموکراتی کوردستانی ئێران لە بەیاننامەیەکدا ڕایگەیاند سەرلەبەیانی ئەمڕۆ هەینی لە سەیرانگایەکی نزیک پاوە پێکدادان لەنێوان هێزەکانیان و سوپای پاسداراندا هاتوەتە ئاراوە.

بەگوێرەی ڕاگەیەنراوەکە "وێڕای ئەوەی هێزەکانی کۆماری ئیسلامی بە کەڵک وەرگرتن لە چەندین جۆر چەکی قورس شوێنی مانەوەی پێشمەرگەکانی کردبووە ئامانج، پێشمەرگەکان لە بەرانبەر ئەو هەموو هێزە و چەک و کەرەستانە، شەرێکی قارەمانانە و بێ وێنەیان ئەنجام دا".

لە ڕاگەیەنراوەکەدا هاتووە " شەڕەکە تا کاتژمێر ۱۱ی پێشنیوەرۆ درێژەی کێشا و سەرچاوەکان باس لەوە دەکەن هێزی دوژمن زیانێکی زۆری بەرکەوتووە".

حدکا ئاشکراشیکردووە "سێ کەس لە هێزەکانی سوپای پاسداران کوژراون و دوو ڕۆڵەی قارەمان و فیداکاری نەتەوەکەمان شەهید بوون".

لەراگەیەنراوەکەدا ئەوەش خراوەتەڕوو "هاووڵاتییەکی دڵسۆزی شاری پاوە بە ناوی فەرشاد چەچان، کە بە مەبەستی سەیران کردن لەو ناوچەیە بوو بە تەقەی هێزەکانی رێژیم کوژرا".


PM:07:05:12/10/2018


ئه‌م بابه‌ته 14060 جار خوێنراوه‌ته‌وه‌‌