له‌ناو گازینۆیه‌كدا 22 تۆمه‌تبار ده‌ستگیركران

وێستگه‌ نیوز –
به‌ڕێوه‌به‌رایه‌تی‌ پۆلیسی‌ پارێزگای‌ سلێمانی‌ ده‌ستگیركردنی‌ 22 تۆمه‌تباری‌ له‌ گازینۆیه‌كدا راگه‌یاند.

له‌ راگه‌یه‌ندراوێكدا كه‌ وێنه‌یه‌كی‌ ده‌ست وێستگه‌ نیوز كه‌وتووه‌، به‌ڕێوه‌به‌رایه‌تی‌ پۆلیسی‌ پارێزگای‌ سلێمانی‌ رایگه‌یاند كه‌ "دوای چاودێریكردنی گازینۆ و كافتریاكانی شاری سلێمانی له‌لایه‌ن هێزه‌كانی پۆلیسه‌وه‌، زانرا له‌به‌شێك له‌و شوێنانه‌دا قومار ده‌كرێت".

پۆلیسی‌ سلێمانی‌ ده‌ڵێت: "دوای وه‌رگرتنی فه‌رمانی دادوه‌ر به‌ڕێوه‌به‌رایه‌تی پۆلیسی پارێزگای سلێمانی به‌سه‌رپه‌رشتی راسته‌وخۆی عه‌میدی مافپه‌روه‌ر ئاسۆ شێخ ته‌ها هه‌ڵمه‌تێكی بۆ گه‌ڕان و پشكنینی گازینۆ و كافتریاكان ده‌ستیپێكرد".

ده‌شڵێت: "ده‌ستیش گیرا به‌سه‌ر 1 ملیۆن و 630 هه‌زار دیناری عیراقی و 100 دۆلار و بڕێك له‌ مه‌شروبات و پولی قوماردا".

راشیگه‌یاندووه‌ كه‌ "له‌ ئێستاشدا تۆمه‌تباران به‌فه‌رمانی دادوه‌ر راگیراون و له‌لایه‌ن بنكه‌ی پۆلیسی سه‌راوه‌ په‌ڕاوی لێكۆڵینه‌وه‌یان بۆ كراوه‌ته‌وه‌".

به‌ڕێوه‌به‌رایه‌تی پۆلیسی پارێزگای سلێمانی جه‌خت ده‌كاته‌وه‌ كه‌ هه‌ڵمه‌ته‌كانی بۆ گه‌ڕان و پشكنین له‌ ته‌واوی گازینۆ و كافتریاكانی شاری سلێمانی به‌رده‌وامییان ده‌بێت و سه‌رجه‌م تۆمه‌تباران رووبه‌ڕووی یاسا ده‌كرێنه‌وه‌.

PM:11:28:14/08/2018

ئه‌م بابه‌ته 18742 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت