توركیا راگه‌یه‌ندراوێكی سه‌باره‌ت به خۆپیشاندانه‌كانی عیراق بڵاوكرده‌وه
وێستگه نیوز –
وه‌زاره‌تی ده‌ره‌وه‌ی توركیا رایگه‌یاند كه له نزیكه‌وه چاودێری خۆپیشاندانی ناڕه‌زایی عیراقییه‌كان ده‌كه‌ن و داواشی له هاوڵاتییه‌كانی كرد له شوێنی ده‌ربڕینی ناڕه‌زاییه‌كان دووربكه‌ونه‌وه.
رۆژی شه‌ممه 2018/7/15 وه‌زاره‌تی ده‌ره‌وه‌ی توركیا راگه‌یه‌ندراوێكی سه‌باره به خۆپیشاندانی پارێزگاكانی عیراق بڵاوكرده‌وه.
وه‌زاره‌تی ده‌ره‌وه‌ی توركیا له راگه‌یه‌ندراوه‌كه‌دا وتی: "له نزیكه‌وه چاودێری خۆپیشاندانه‌كان ده‌كه‌ین كه ژماره‌یه‌ك پارێزگای عیراقی گرتووه‌ته‌وه و به‌ره‌و پارێزگاكانی تر ده‌چێت".
وتیشی: "داوا له هاوڵاتییه‌كانمان له عیراق ده‌كه‌ین له شوێنی ده‌ربڕینی ناڕه‌زاییه‌كان له پارێزگاكانی عیراق دووربكه‌ونه‌وه".
وه‌زاره‌تی ده‌ره‌وه‌ی توركیا داواشی له توركه‌كان كرد ئه‌و رێنماییانه جێبه‌جێ بكه‌ن كه باڵیۆزخانه‌كه‌یان له به‌غدا بڵاویده‌كاته‌وه و له كاتی روودانی هه‌ر حاڵه‌تێكی كتوپڕدا په‌یوه‌ندی به باڵیۆزخانه‌كه‌وه بكه‌ن.
رۆژی 8ی ته‌مموزی 2018، خۆپێشاندان لە شاری بەسڕە دژی نەبوونی كارەبا و ئاوی پاك دەستی پێ كرد، پاش ئەوەی پۆلیس و هێزە ئه‌منییەكان تەقەیان لە خۆپێشاندەران كرد، بەوهۆیەوە سێ كەس بریندار بوون و دواتر یەكێك لە بریندارەكان گیانی لە دەست دا، بۆ رۆژی دواتر خۆپێشاندان سەرجەم ناوچەكانی بەسڕەی گرتەوە و بەردەوامی هەبوو.
لە رۆژی پێنجشەممه‌ی رابردوو خۆپێشاندەران چوونە سەر كێڵگەی نەوتی قوڕنە دوو و ئاگریان لە فەرمانگەی بەڕێوەبردنی كێڵگەكە بەردا، بە هەلیكۆپتەر فەرمانبەره بیانییەكانی ناو كێڵگەكە گوازرانەوە، رۆژی هەینیش خۆپێشاندانەكان زۆربەی شارەكانی باشووری عیراقی گرتەوە و فڕۆكەخانەی نەجەف داخرا و بارەگای نۆ حزب سووتێنران و 40 شەقامی سەرەكی هاتوچۆیان لێ وەستا و 63 كورژاو و برینداریشی لێ كەوتەوە.
دوێنێ شه‌ممه‌ش خۆپیشاندان له زۆربه‌ی شاره‌كانی ناوه‌ڕاست و باشووری عیراق ده‌ستی پێكرده‌وه و حكومه‌تی عیراقیش حه‌وت بڕیاری بۆ دامركاندنه‌وه‌ی ناڕه‌زایی هاوڵاتیانی به‌سره ده‌ركرد.
AM:08:22:15/07/2018
ئه‌م بابه‌ته 2528
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت