د.کاوە مەحمود: كه‌س ناتوانێت مافی سه‌ربه‌خۆیی له‌كورد زه‌وت بكات
وێستگه‌نیوزـ ڕاپۆرت: محەمەد چاوشین
د.کاوە محموود سکرتێری کۆمیتەی ناوەندی حیزبی شیوعی کوردستان ڕایگەیاند، حیزبی شیوعی کوردستان ھەمیشە لەگەڵ داواکارییە ڕەواکانی خەڵکدا بووە، ئەو داواکاریانەی لەسەر بنەمای عەقڵانی داڕێژراون و دوورن لە کولتووری ھێرش بردن و سوتاندنی بارەگا و فەرمانگە حکوومییەکان.
د.کاوە لە مەراسیمێکی جەماوەریدا له ھۆڵی"فەقێ ئەحمەدی دارەشمانە"ی شاری قەڵادزێ وتی:" ئێمە بەدەوری زام و ئێش و ئازاری خەڵکدا نەسوڕاوینەتەوە، نەھاتووین زامەکان بکولێنینەوە، ئێمە ھەوڵمان داوە و ھەوڵیش دەدەین دەست نیشانی نەخۆشی و برینەکان بکەین و دواتر چارەسەری ڕیشەیی و عەقڵانییان بۆ بدۆزینەوە، شیوعییەکان لە دەربڕینی ھەڵوێستەکانیاندا شەرم لەکەس ناکەن و بەشێوەیەکی ڕەوان بۆ خەڵکی دەخەنەڕوو، ئێمە دەمانەوێ ئابووری کوردستان سەربەخۆ بێت، سیاسەتی ئابووری سەربەخۆمان ھەبێت، بەڵام نەک بەو سیاسەتەی ئێستاوە کە لەعێراق و لەکوردستانیشدا پەیڕەوی لێ دەکرێت، چونکە ئەو سیاسەتەی ئێستای عێراق و کوردستان، سیاسەتێکی تێکدەرانە و خراپە، خەڵک زیاتر بەرەو ھەژاری و بێکاری دەبات، سێکتەرە جیاوازەکانی خزمەتگوزاریش دەدرێنە دەست کەرتی تایبەتەوە، ھەموو لایەنەکانی کوردستانیش پێشبڕکێ دەکەن لەسەر بەرەو پێش بردنی ئەو سیاسەتە سەقەتە ئابوورییە".
ئاماژه‌ی به‌وه‌شكرد، "ھەڵبژاردنی داھاتووی عێراق جیاوازی زۆری دەبێت لەو ھەڵبژاردنانەی کە لە ڕابردوودا لەو وڵاتەدا ئەنجام دراون، بەشێکیش لەو جیاوازیانە خۆی لەوەدا دەبینێتەوە کە حوکمڕانی لە بەغدا، تا دێت زیاتر بەرەو مەزھەبی و تایفەگەری ھەنگاو دەنێت، مەلەفی ئەمنی زۆربەی شارەکانی عێراق بەدەستی میلیشیاکانی "حەشدی شەعبی"یەوەن، ھەمان ئەو حەشدی شەعبییەی کە بەپێی یاسایەکی ئەنجوومەنی نوێنەرانی عێراق بووەتە ھێزێکی فەرمی و بەداخەوەش بەشێک لە نوێنەرانی کورد لەناو ئەنجوومەنی نوێنەراندا، دەنگیان بەو یاسایە داوە، ئەمەش لەکاتێکدایە کە بەپێی دەستووری عێراق، نابێ ھیچ ھێزێکی چەکدار و میلیشیا لەسەربنەمای تایفی و مەزھەبی و دینی درووست بکرێت".
د.کاوە مەحموود ئه‌وه‌شی خسته‌ڕوو كه ئێستا بیر لەوە دەکرێتەوە لە دەستووری عێراقدا ئەوە بچەسپێنرێت کە حکوومەتی زۆرینە لەعێراقدا ھەبێت و کۆتایی بە حکومەتی"شەراکەت"بھێنرێت، ئێستا لەعێراقدا قەیرانی نەبوونی"دەوڵەت" بوونی ھەیە، ئەوەی لەعێراقدا ھەیە کۆمەڵێک دەسەڵاتە کە ئەو دەسەڵاتانە ناوچە جیاجیاکانی عێراقیان بەسەر خۆیاندا دابەشکردووە، ئەوەش ناوەرۆکی حوکمڕانی ئێستای عێراقە، دەبێ ئەو ڕاستییە بۆ خەڵک ڕوون بکرێتەوە.
د.کاوە لەسەر پەیوەندییەکانی نێوان عێراق و ھەرێمی کوردستان وتی:"لەدوای ساڵی ٢٠٠٣ وە، پەیوەندییەکانی نێوان بەغدا و ھەرێم لەسەر بنەمای فیدڕاڵیەت بووە کە لەدەستووری عێراقدا ئاماژەی بۆ کراوە، بەڵام نە دەستوور جێبەجێ کراوە و نە فیدڕاڵیەتەکەش جێگیر بووە، ئەو دۆخەش دەبێ وامان لێ بکات پرسیار لەسەر ئەو شێوە پەیوەندییە بکەین لەنێوان عێراق و ھەرێمدا، پرسیار لەسەر ئەوەی کە ئاخۆ چارەسەری فیدڕاڵی، ڕێگای چارەسەری ڕیشەیی پرسی نەتەوەیی گەلی کوردستانە لەچوارچێوەی عێراقدا؟ دەبێ وەڵامێکی جدی و گشتگیرمان بۆ ئەو پرسیارە ھەبێت، دەبێ ئەوەمان لەبەرچاو بێت کە بەردەوام بوون و جێگیرکردنی سیستمی فیدڕاڵی، پەیوەندی بە دێموکراسیەتەوە ھەیە، لەنێوان فیدڕاڵی و دێموکراسیەتیشدا عەلمانیەت بوونی ھەیە، کە باسی عەلمانیەتیش دەکەین مانای ئەوەیە ڕێز لە بیر و باوەڕی ئاینی بگرین و دینیش نەچێتە ناو سیاست و دەوڵەتدارییەوە، بەڵام لەئێستای عێراقدا ئەو شتە بوونی نییە، ئایا ڕەوایە خەڵک بە فتوای مەرجەعە دینی و مەزھەبییەکان دەنگ بە لایەنێک بدەن و بە فتوای ئەوانیش دژی لایەنێکی دیکە بن؟
د.کاوە مەحموود سه‌باره‌ت به‌هه‌ڵوێستی حزبه‌ی روونیكرده‌وه، "وەکو حیزبی شیوعی ڕامان گەیاندووە کە داوای دەوڵەتێکی مەدەنی دێموکراتی عەلمانی دەکەین، ئەوەش جیاوازی سەرەکی ئێمە و لایەنەکانی دیکەیە، ئێمە وەکو پرەنسیپ باوەڕمان بە گفتووگۆ ھەیە، بەڵام گومانمان ھەیە کێشە و ئاریشەکانی نێوان ھەرێم و عێراق لەسەر بنەمای دەستوور چارەسەر بکرێن، چونکە دەستوور جێبەجێ ناکرێت، دەبێ گیانی بەرەنگاری خۆمان نیشانی لایەنه‌کانی دیکە بدەین و ڕێگا نەدەین بە کەم تەماشای مافەکانی گەلەکەمان بکەن، نابێ خۆمان بە بچووک بزانین، ماف و داواکانی گەلەکەمان گەورەن".
سه‌باره‌ت به كه‌یسی سه‌ربه‌خۆیی وتی:"کاتێک گەلەکەمان داوای سەربەخۆیی دەکات، ئەوە داخوازییەکی ڕەوایە، ھیچ گرووپ و لایەنێکی نێودەوڵەتی ناتوانێ ئەو مافە لە کورد زەوت بکات، ڕاستە زۆر لایەن لەگەڵماندا نین، بەڵام ئەو لایەنانە ناتوانن ڕێگا لە تێکۆشانی گەلەکەمان بگرێت بۆ بەدەست ھێنانی سەربەخۆیی".
ئاماژه‌ی به ھەڵبژاردنەکانی داھاتووی عێراقیش كرد و رونیكرده‌وه، "لەوانەیە بەشێک لە لایەنە سیاسییەکان بتوانن کورسی په‌رلەمانی لە ئێمە زیاتر بەدەستبێنن، بەڵام ناتوانن تەحەدای ئێمە بکەن لە دڵسۆزیمان بۆ گەل و نیشتیمان، لە داکۆکی کردنمان لە مافی زەحمەتکێشان، لە تێکۆشانمان بۆ سەربەخۆیی کوردستان، ئەوەش سیاسەتی نەگۆڕی حیزبی شیوعی کوردستانە و بە پشت بەستن بە جەماوەرەکەمان بەردەوام دەبین لەسەر ئەو ڕێبازە".
به‌وته‌ی د. كاوه مه‌حمود، "تێکڕای ئەو گیروگرفتانەی لەو ناوچەیەدا ھەن، ھەموویان ھەوڵدانە بۆ دەسخەڕۆکردنی خەڵکی زەحمەتکێشی ئەو ناوچەیە، بەفیڕۆدانی سامانی ئەو ناوچەیەیە بۆ بەرژەوەندی و گیرفانی وڵاتە زلھێزەکان، بەرژەوەندی گەلی کوردستانمان لەلا گرنگترە تا بەرژەوەندییەکانی تورکیا و ئێران و ڕووسیا و ئامریکا، ناشمانەوێ کوردستان ببێتە گۆڕەپانی ململانێی ئەو ھێزانە، ھەر بەو ئاراستەیەشدا تەماشای دواڕۆژی گەلەکەمان دەکەین".
د.کاوە مەحموود سه‌باره‌ت به روانگه‌ی حزبه‌كه‌ی وتی:"ئێمە شیوعین، شانازی دەکەین بە مۆرکی نیشتیمانی و کوردستانی بوونی خۆمانەوە، شانازی دەکەین کە کۆمۆنیستین و بەوەی جیاوازی ناکەین لەنێوان ھیچ پێکھاتەیەکی کوردستاندا لەسەر بنەمای نەتەوە و ئاین و مەزھەب، شانازی دەکەین کە پارێزەری ڕاستەقینەی ماف و بەرژەوەندییەکانی کرێکاران و جووتیارانین، ئێمە کار بۆ سۆسیالیزم دەکەین، چونکە پێمان وایە بەبێ سۆسیالیزم ئاسۆی مرۆڤایەتی لەھەموو دنیادا بەرەو بن بەست دەڕوات".
AM:10:30:09/05/2018
ئه‌م بابه‌ته 5431
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت