سەنتەری میترۆ: سێ رۆژنامەنووسی كورد لە كەركوك دەستگیركران
وێستگە نیوز- پشتیوان جەمال
سەنتەری میترۆ بۆ داكۆكیكردن لە رۆژنامەنووسان رایدەگەیەنێت لەلایەن هێزی دژی تیرۆرەوە سێ رۆژنامەنووس لە شاری كەركوك دەستگیركراون.
رەحمان غەریب، رێكخەری سەنتەری میترۆ بۆ داكۆكیكردن لە مافی رۆژنامەنووسان بە وێستگە نیوزی راگەیاند، بەپێی زانیارییەكانیان، ئەمڕۆ لەناو قاوەخانەی كلتوری لە گەڕەكی رەحیماوای شاری كەركوك، دوو كەس داوای ناسنامەیان لە هونەر ئەحمەد و هەردی محەمەد رۆژنامەنووس لە تۆڕی میدیایی رووداو كردووە و پاشان هێزێكی دژە تیرۆری عیراقی هاتوەتە ناو قاوەخانەكە، ئەو دوو رۆژنامەنووسە و رۆژنامەنوسیكی دیكەی كوردیان دەستگیركردووە كە ئەو رۆژنامەنووسەی دیكە بۆ كەناڵێكی ئوستورالی كاری كردووە.
ناوبراو وێڕای دەربڕینی ناڕەزایی خۆیان بۆ ئەو دەستگیركردنە وتی "دیارە پێشتر رۆژنامەنوسانی رووداو چاودێرییان كراوە، بەڵام ئەو كارەی دژە تیرۆر، درێژكراوەی هەمان سیاسەتی حكومەتی عیراقییە لە قەدەغەكردنی كاركردنی كەناڵەكانی رووداو و كوردستان 24 لە ناوچەكانی عیراق، وەكو سەنتەری میترۆ بەدواداچوون بۆ ئەو دەستگیركردنانە دەكەین".
پێشتر هونەر ئەحمەد راپۆرتێكی مەیدانی لە قەزای خورماتوو لەسەر ئەو پێشێلكارییانە كرد كە لەلایەن هێزە عیراقییەكان ئەنجامدراوە.
دوای رووداوەكانی 16-10-2017 حكومەتی عیراق رێگەی كاركردن لە تۆڕی میدیایی رووداو و كوردستان 24 لە ناوچەكانی ژێر دەسەڵاتی گرتووە.
PM:08:59:20/03/2018
ئه‌م بابه‌ته 2524
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت