توركیا فیشه‌ك و ته‌قه‌مه‌نی نوێ له عه‌فرین به‌كاردێنێت
وێستگه نیوز –
وه‌زیری به‌رگری توركیا رایگه‌یاند كه وڵاته‌كه‌ی به‌نیازه له پرۆسه‌ی هێرشكردنه‌سه‌ر كانتۆنی عه‌فرین له رۆژئاوای كوردستان فیشه‌ك و ته‌قه‌مه‌نی نوێ به‌كاربێنێت.
ئه‌مڕۆ دووشه‌ممه نوره‌دین جانیكلی وه‌زیری به‌رگری توركیا له په‌راوێزی رێوڕه‌سمی كردنه‌وه‌ی پێشانگا و كۆنگره‌ی ده‌وحه‌ی نێوده‌وڵه‌تی بۆ به‌رگری ده‌ریایی "دیمدكس 2018" رایگه‌یاند كه له كۆتایی مانگی نیسانی داهاتوودا دواتاقیكردنه‌وه بۆ هه‌ندێك فیشه‌ك و ته‌قه‌مه‌نی نوێ ده‌كرێت و دواتر راده‌ستی هێزه‌كانی توركیا ده‌كرێن.
نوره‌دین جانیكلی ئاماژه‌ی به‌وه‌دا كه له شه‌ڕی عه‌فریندا به‌ڕێژه‌یه‌كی زۆر چه‌ك و فیشه‌ك و ته‌قه‌مه‌نی به‌رهه‌مهێنراوی توركی به‌كارده‌هێنرێت و "ته‌كنه‌لۆژیای پیشه‌سازی به‌رگری توركی له سفره‌وه ده‌ستی پێكرد و گه‌یشته به‌رهه‌مهێنان".
وتیشی: "له به‌رنامه‌ماندایه له پرۆسه‌ی هێرشكردنه‌سه‌ر عه‌فرین فیشه‌ك و ته‌قه‌مه‌نی نوێ به‌كاربێنین".
كاتێكی پێشتری ئه‌م مانگه‌ش وه‌زیری به‌رگری توركیا ئاشكرایكرد كه هێزه‌كانیان به‌نیازن مووشه‌كی نوێی پێشكه‌وتوو كه له ناوخۆی ئه‌و وڵاته به‌رهه‌مهێنراوه له پرۆسه تایبه‌ته‌كانیان له عه‌فرین به‌كاربێنن.
سه‌رچاوه: RT
PM:07:51:12/03/2018
ئه‌م بابه‌ته 2400
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت