ئه‌مریكا باری نا ئاسایی له سوریا بۆ ماوه‌ی ساڵێكی تر درێژ كرده‌وه
وێستگه‌نیوزـ
کۆشکى سپى ئاشکرایکرد کە بۆ ماوەى ساڵێکى دیکە بارى نائاسایی لە سوریا درێژکردوەتەوە و جەختیش دەکاتەوە کە پێویستە بەشار ئەسەد، توندوتیژییەکانى لە سوریا رابگرێت و ئاگربەستى سەرتاسەریی رابگەیەنێت.
بەپێی راگەیەنراوەکەى کۆشکى سپى ئەمریکا؛ لە 11ـى ئایارى 2004 و بەپێی دەسەڵاتە فریاگوزارییە ئابورییە نێودەوڵەتییەکان و یاساى لێپرسینەوە لە سوریا و گەڕاندنەوەى سەروەرى لوبنان لە ساڵى 2003 سەرۆکى ئەمریکا یاساى ژماره 13338ى دەرکردوە.
بەپێی ئەو یاسایە بارى نائاسایی نیشتیمانى لە سوریا دژى کردەوەکانى حکومەتى سوریا دەرکردوە و دواتریش ئەم یاسایە چەند جارێک لە ساڵەکانى 2006 و 2008 و 2011 و 2012 جێبەجێکراون و درێژکراونەتەوە.
ئاماژە بۆ ئەوەکراوە کە سەرۆکى ئەوکاتى ئەمریکا ئەم بڕیارەى بۆ مامەڵەکردن لەگەڵ ئەو مەترسییانە دەرکردوە کە لەسەر ئاسایشى نیشتیمانى و سیاسەتى دەرەوە دروستبوە.
کۆشکى سپى لە راگەیەنراوەکەیدا دەڵێت: دڕندەیی و سەرکوتکردنى حکومەتى سوریا نەک تەنها مەترسییە بۆسەر خەڵکەکەى بەڵکو دەبێتە هۆى دروستکردنى ناسەقامگیریی لە تەواوى ناوچەکە و هەربۆیە بۆ جارێکى دیکە بارى نائاسایی لە وڵاتەکە بۆ ماوەى ساڵێکى دیکە و بۆ ساڵى 2024 درێژ دەکرێتەوە.
کۆشکى سپى ئیدانەى توندوتیژیی و پێشێلکارییەکانى مافى مرۆڤ لە سوریا و لەلایەن بەشار ئەسەد ئیدانە دەکات و داوا دەکات چى زوە رژێمى سوریا شەڕ و کوشتارى وڵاتەکە دژى گەلەکەى خۆى رابگرێت و داوا دەکات ئاگربەستى سەرتاسەریی رابگەیەنرێت تا گەیاندنى هاوکارییە مرۆییەکان هیچ بەربەستێکیان لەبەردەمدا نەمێنێت.
ئاماژە بۆ ئەوەشکراوە کە ئەمریکا گۆڕانکارییەکان لە سیاسەتى سوریا و رژێمەکەى لە داهاتوودا لەبەرچاو دەگرێت بۆ بەردەوامبون یاخود درێژەدان بە راگەیاندنى بارى نائاسایی لەو وڵاتە لە داهاتوودا.
AM:09:06:09/05/2024
ئه‌م بابه‌ته 472
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت