ئاگر له ناوه‌ندی فه‌رهه‌نگ و ئه‌رشیفی دیبه‌گه به‌ردرا
وێستگه‌نیوزك شاهین فوئاد-
به‌ره‌به‌یانیی ئه‌مڕۆ شه‌ممه، له‌لایه‌ن كه‌سانی نه‌ناسراوه‌وه ئاگر له ناوه‌ندی فه‌رهه‌نگ و ئه‌رشیفی دیبه‌گه‌ی سه‌ر به شاری هه‌ولێر به‌ردرا.
له‌م باره‌وه، مۆزه‌خانه و ئه‌رشیفی په‌روه‌رده‌ی هه‌ولێر راگه‌یاندراوێكی بڵاو كرده‌وه و تێیدا هاتووه كه "به‌داخه‌وه به‌یانیی ئه‌مڕۆ شه‌ممه 29ی 3ی 2025، ده‌ستێكی ڕه‌ش و تێكده‌ر له هه‌وڵێكی ترسنۆكانه‌یاندا ئاگریان له (ناوه‌ندی فه‌رهه‌نگی و ئه‌رشیفی دیبه‌گه) به‌ردا."
مۆزه‌خانه و ئه‌رشیفی په‌روه‌رده‌ی هه‌ولێر ده‌ڵێت: "ئه‌و ناوه‌نده فه‌رهه‌نگیه جگه له كۆكردنه‌وه‌ی ژماره‌یه‌ك له كه‌لوپه‌لی كلتوری، له هه‌مانكاتدا ئه‌رشیفی په‌روه‌رده و خوێندنی سه‌ره‌تای سییه‌كانی كۆكردۆته‌وه، كه له‌سه‌ر ده‌ستی نووسه‌ر و ڕۆژنامه‌نووس (عه‌دنان حاجی كاكه)وه دوای پرۆسه‌ی ئازادكردنی عێراق له 2003 و گه‌ڕانه‌وه‌یان بۆ زێدی خۆیان، بنیات نراوه".
له كۆتاییدا ئه‌وه‌ش خراوه‌ته ڕوو: "ئه‌م ناوه‌نده هه‌رده‌م هاوكارمان بووه، هیوادارین لایه‌نه په‌یوه‌ندیداره‌كان به‌زووترین كات لێكۆڵینه‌وه له ئه‌نجامدانی ئه‌و ڕووداوه بكه‌ن و ئه‌نجامده‌رانیشی به‌سزای خۆیان بگه‌ن و هه‌موو لایه‌كیش هاوكاربن بۆ سه‌رله‌نوێ جارێكی دیكه به‌شێوه‌یه‌كی باشتر بنیات بنرێته‌وه".
PM:03:10:29/03/2025
ئه‌م بابه‌ته 760
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت