لەبارەی مووچەی خانەنشینانەوە هۆشداری دەدرێت

وێستگەنیوز-

وتەبێژی یەكێتیی خانەنشینانی هەرێم هۆشداری دەدات لە فەوتاندنی مووچەی پێنج مانگی خانەنشینان و رایدەگەیەنێت، ئەو خانەنشینانەی رووبەرووی دواکەوتنی مووچە بوونەتەوە زیاتر لە 25 هەزار کەسن.

ئەمڕۆ سێشەممە 25ی ئاداری 2025، سادق عوسمان، وتەبێژی یەكێتیی خانەنشینانی هەرێم رایگەیاند، "پێویستە بۆ زیاتر دوانەکەوتنی مووچەی خانەنشینان، ژمارەی تیمی وردبینی لە بەرێوەبەرایەتیی خانەنشینی زیادبکرێت تاوەکو پڕۆسەکە خێراتر بکرێت، چونکە ئەگەر مامەڵەکان بەم جۆرە بەردەوامبن ئەوا خانەنشینان مووچەی پێنج مانگیان دەفەوتێت".

وتەبێژی یەكێتیی خانەنشینانی هەرێم ئاماژەی بەوەشکرد، "ئەو خانەنشینانەی رووبەرووی دواکەوتنی مووچە بوونەتەوە زیاتر لە 25 هەزار کەسن".

ئەوەشی خستەڕوو، "لە شاری سلێمانی زیاتر لە 11 هەزار مامەڵەی خانەنشینی هەن و لەو ژمارەیە تەنها 150 کەسیان مامەڵەیان بۆ ئەنجامدراوە، ئەو کەسانەشی مامەڵەکانیان تەواوبووە، مووچەی مانگی یەک و دوو و سێ وەردەگرن".

لەبارەی چارەنووسی 100 هەزاری خانەنشینان سادق عوسما وتی، "ئێستا حکومەتی هەرێمی کوردستان و وەزارەتی دارایی هەرێم داوایان لە حکومەتی عێراق کردووە جارێکی دیکە هەرێـمی کوردستانیش بگرێتەوە و پێشبینی دەکرێت بۆ مانگی چوار ئەو بڕە پارەیە خەرج بکرێتەوە".

AM:10:59:25/03/2025

ئه‌م بابه‌ته 440 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت