داواكاری گشتی عێراق دۆسیه‌كه‌ی دڵشاد بارزانی ئاراسته‌ی دادگا كرد
وێستگه‌نیوز-
داواكاری گشتی عێراق دۆسیه‌ی به‌شداریكردنی دڵشاد بارزانی برای سه‌رۆكی پارتی دیموكراتی كوردستان و نوێنه‌ری حكومه‌تی هه‌رێمی ئاراسته‌ی دادگا كرد بۆ گرتنه‌به‌ری رێوشوێنی یاسایی.
ئه‌مڕۆ دووشه‌ممه دادوه‌ر نه‌جم عه‌بدوڵا سه‌رۆكی داواكاری گشتی له ئه‌نجومه‌نی باڵای دادوه‌ری عێراق، دۆسیه‌ی به‌شداریكردنی دڵشاد بارزانی نوێنه‌ری حكومه‌تی هه‌رێم له ئه‌ڵمانیا و برای مه‌سعود بارزانی سه‌رۆكی پارتی دیموكراتی كوردستانی له ئاهه‌نگی نه‌ورۆز له باڵیۆزخانه‌ی ئیسرائیل ئاراسته‌ی دادگای لێكۆڵینه‌وه‌ی 3ی كه‌رخ له شاری به‌غداد كرد.
له نووسراوه‌كه‌دا سه‌رۆكی داواكاری گشتی له ئه‌نجومه‌نی باڵای دادوه‌ری عێراق داواكاره دادگای لێكۆڵینه‌وه‌ی 3ی كه‌رخ رێوشوێنی یاسایی بگرێته‌به‌ر به‌زووترین كات له رێوشوێنه‌كانیان ئاگاداریان بكه‌نه‌وه.
هاوكات ئه‌مڕۆ دكتۆر محه‌مه‌د جاسم خه‌فاجی ئه‌ندامی لیژنه‌ی یاسای په‌رله‌مانی عێراق نووسراوی ئاراسته‌ی داواكاری گشتی كردووه بۆ جوڵاندنی سكاڵا له سه‌ر هه‌مان دۆسییه.
دكتۆر محه‌مه‌د جاسم خه‌فاجی به نووسراوێكی تر داوای له فوئاد حسێن وه‌زیری ده‌ره‌وه كردووه رێوشوێن بگرێته‌به‌ر و له دادگای تایبه‌تمه‌ند سكاڵا تۆماربكات!
رۆژی هه‌ینی 21ی ئاداری 2025، مسته‌فا جه‌بار سه‌نه‌د ئه‌ندامی ئه‌نجومه‌نی نوێنه‌رانی عێراق به نووسراوێك داوای له ده‌زگای داواكاری گشتی كرد سكاڵا دژی (دڵشاد مسته‌فا محه‌مه‌د بارزانی) نوێنه‌ری حكومه‌تی هه‌رێمی كوردستان له ئه‌ڵمانیا بجوڵێنێت به‌هۆكاری به‌شداریكردنی له ئاهه‌نگی جه‌ژنی نه‌ورۆز له باڵیۆزخانه‌ی ئیسرائیل.
له نووسراوه‌كه‌دا مسته‌فا جه‌بار ئاماژه‌ی به‌وه‌داوه كه ئه‌و كاره‌ی دڵشاد بارزانی "تاوانی ئاساییكردنه‌وه‌ی په‌یوه‌ندییه‌كانه له‌گه‌ڵ قه‌واره‌ی زایۆنی كه به‌پێی یاسا سزای بۆ دانراوه، بۆیە پێویستە بەگوێرەی یاسای تەجریمکردنی ئاساییکردنەوەی پەیوەندی لەگەڵ ئیسرائیل بە یاسایی ژمارە 1ـی 2022 سزا بدرێت".
ئه‌و په‌رله‌مانتاره له‌گه‌ڵ نووسراوه‌كه‌دا (C D)یه‌ك و لینكێكی ئه‌لیكترۆنی هاوپێچ كردووه كه تیایدا نوێنه‌ره‌كه‌ی حكومه‌تی هه‌رێم له باڵیۆزخانه‌ی ئیسرائیل له ئه‌ڵمانیا ده‌ركه‌وتووه.
له 26ی ئایاری 2022 په‌رله‌مانی عێراق، یاسای تەجریمکردنی ئاساییكردنه‌وه‌ی په‌یوه‌ندییه‌كانی عێراقی له‌گه‌ڵ ئیسرائیل په‌سه‌ند كرد. ئه‌م یاسایه به تێكڕای ده‌نگی 275 ئه‌ندام په‌رله‌مان په‌سه‌ند كرا.
یه‌كێك له خاڵه گرنگه‌كانی یاسای نوێ كه له په‌رله‌مان په‌سه‌ند كرا
ئه‌وه‌یه كه، باسی ئه‌وه ده‌كات ھه‌موو كار و چالاكییه‌ك له‌گه‌ڵ
ئیسرائیل قه‌ده‌غه‌یه؛ ھه‌روه‌ھا نابێت عێراق ھیچ په‌یوه‌ندییه‌كی سیاسی،
دیپلۆماسی، ئابووری و كۆمه‌ڵایه‌تیی له‌گه‌ڵ ئیسرائیلدا ھه‌بێت.
ئه‌م یاسایه ته‌نانه‌ت چالاكیی ڕۆشنبیری، میدیایی، سۆشیال میدیا و
ڕێكخراوه‌كانی كۆمه‌ڵگه‌ی مه‌ده‌نییش له‌گه‌ڵ ئیسرائیل به تاوان
ده‌ناسێنێت.
به گوێره‌ی یاساكه، ھه‌ر كه‌سێك یان لایه‌نێك پێچه‌وانه‌ی ئه‌مه
كار بكات، سزاكه‌ی زیندانی ھه‌تاھه‌تایی یان له‌سێداره‌دان ده‌بێت.
PM:09:23:24/03/2025
ئه‌م بابه‌ته 704
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت